LAOAG CITY – Balligi a naarestar ti Top 4 Most Wanted Person iti Regional Level iti maikadua a kuarter iti tawen 2024 iti ili ti Vintar.
Segun ken ni Police Captain Roi Manuel Ordonio, ti Hepe iti Philippine National Police iti nasao nga ili, nabigbig ti suspek nga agtawen ti 53, naasawaan, mannalon ken residente iti nadakamat met laeng nga ili.
Inbatadna a natiliw ti suspek babaen iti bileg ti Warrant of Arrest nga inparuk-at ni Hon. Bonhoefer Vergara Bernandez, Presiding Judge, Family Court First Judicial Region, Branch 4 ditoy siudad ti Laoag gapu iti kaso a Sexual Assault a napetsaan idi Mayo 13, 2024 nga adda ti 200 a ribu a pisos a nairekomendar a pagpiyansana para iti temporario a pannakawayawayana.
Malaksid iti daytoy, kunana nga adda pay ti sabali a Warrant of Arrest nga inyisyu ti isu met laeng a Presiding Judge gapu iti kaso nga Statutory Rape nga awan ti nairekomendar a piyansa daytoy.
Kabayatanna, naarestar ti akusado babaen iti nagtitipon a puersa ti Joint Intel Operatives ken Tracker Team ti Vintar Municipal Police Station nga indauluan ni Police Captain Ordonio pakairamanan ti kameng ti PIDMU, INPPO PPO, PIU-INPPO ken WCPD-INPPO.
