LAOAG CITY – Inbatad ni Nicole Jennica Bumagat Isla iti Barangay 5, Bacarra, Ilocos Norte a saanna pulos a ninamnama nga ag-top 5 daytoy iti Nursing Licensure Examination gapu ta narigat ti eksaminasyon.
Ni Isla ket nagturpos iti Mariano Marcos State University iti ciudad ti Batac ken addaan daytoy iti average nga 85.80 percent.
Segun ken ni Isla, municipal scholar nangrugi idi high school a nagturpos iti Bacarra Comprehensive National High School idiay ili ti Bacarra agingga iti third year college iti MMSU-Batac.
Inlawlawag na a ti ama na ket maysa a construction worker ken ti ina na ket plain house wife.
Mainaig ti daytoy, inbalakad ni Isla kadagiti estudyante nga ipasnek da ti agadal, agkararag a kanayun ken masapol nga agtalek ti kabaelan da.
Kabayatanna, nagyaman ni Isla iti Diyos, dagiti mangisursuro iti nasao nga unibersidad ken ti pamilya na a kangrunaan a mangipapaay ti suporta kenkuana.
