LAOAG CITY – Manamnama nga irakurak ti Malakanyang ti sumaruno a baro nga hepe ti Philippine National Police.
Daytoy ket kagiddan ti dandanin a panagngudo ti termino ken panagretiro ni Philippine National Police Chief General Rommel Marbil inton Hunio ita a tawen.
Nupay kasta, inbatad ni Palace Press Officer Undersecretary Atty. Claire Castro nga awan pay ti naaw-awatna nga impormasion no asino ti posible a mangsukat iti puesto ni Marbil.
Iti baet daytoy, adda dagiti naaweng a nagnagan ngem kuna ni Castro a nasaysayaat laengen nga iyuray ti rakurak mismo ni Presidente Ferdinand Marcos Jr.
Kunana nga apaman nga iburay daytoy ti Palasyo ket insigida met nga ipubikar iti publiko.
Naammoan a karaman kadagiti nagnagan a mabalin a mangsukat iti puesto ken ni Marbil ket isuda PNP CIDG Chief Major General Nicolas Torre III ken dati nga NCRPO Chief Lt. General Narciso Nartatez Jr.
Naglippas ti termino ni Marbil idi Pebrero ngem gapu ta panawen ti eleksion ket inyalud-od ni Presidente Marcos ti panagserbina agingga inton bulan ti Hunio.
