LAOAG CITY – Napagsasaritaan ti nagwaras a ladawan ti traffic aide ditoy ciudad ti Laoag a saan a nagisuot ti helmet bayat a nakamotorsiklo.
Ti driver ti motorsiklo ket ni Lorenzo idinto a ti nailubbon a saan a naksuot ti helmet ket ni Arwin Curammeng.
Inbatad met ni Police Chief Master Sergeant Eric Bumagat, mangidadaulo ti PNP-Traffic Division ditoy ciudad ti Laoag a pinaayaban na a dagus dagiti dua a traffic aide.
Kunana a basar iti palawag dagiti traffic aide kenkuana ket napan nagmeryenda iti maysa karinderya dagiti dua a traffic aide ken agpada nga addaan ti helmet.
Nupay kasta, kunana nga idi nagsubli da iti pwesto da ket nakigtot dagiti pada da a traffic aide a nakakita gapo ta awan ti suot nga helmet ti nakalubbon.
Segun kenni Bumagat, uray ti traffic aide a saan a nakasuot ti helmet ket nasdaaw gapo ta saan na a nadlaw a kallugong laeng ti adda iti ulo na ken nalipatan da ti helmet na iti nagmeryendaan da.
Inlawlawag na a gapo iti daytoy ket naisyuan ti citation ticket dagitoy ken binalakadan na dagiti maseknan a saan dan ton nga ar-aramiden nangruna ket isuda ti rumbeng nga agbalin nga ehemplo.
Mainaigiti daytoy, inbatad ni Bumagat a kasarita nanto manen dagiti amin a traffic aide ditoy ciudad ti Laoag tapno maipakaammo manen dagiti rumbeng nga aramiden da ken sumurot da met iti paglintegan.
