LAOAG CITY –Agsagsagana ti transport group a PISTON para iti iwayatda a maysa a nalawa a panagsardeng a panagbiahe kas paset ti panangkontrada iti agsasaruno a panagngato ti presio dagiti produkto ti petrolyo ditoy pagilian.
Segun ken ni PISTON National President Modesto Floranda, sisusuportada iti dua nga aldaw a transport strike nga iwayat ti grupo ti MANIBELA manipud inton Lunes, Setiembre 14 nga iti agdama, kalikagumda pay ti naatatiddog a panagsardeng ti panagpasada.
Inpetteng ni Floranda a saan nga umanay ti fuel subsidy ti gobierno para kadagiti tsuper ken operator, bayat nga agtaltalinaed ti ikkisda a maibasura ti Oil Deregulation Law.
Inlawlawag ti lider-tsuper, nga iti uneg ti 28 a tawen manipud idi naipila ti nasao a linteg ket ditoyen a nangrugi ti mapaspasaranda a rigat gaputa nangitunda daytoy iti kinaawan ti kontrol iti panagngato ti presio dagiti langis iti merkado.
Kabayatanna, nagballaag manen ti industriya ti langis iti manamnama a baro a panagngato ti presio ti langis inton sumaruno a lawas.
