LAOAG CITY – Saan a pabor ni Mr. Jun Santiago, driver iti tradisyunal jeepney nga addaan ti rota a Laoag-San Nicolas iti pannakaiyuswat ti transport strike iti pagilyan.
Naituding a mangiyuswat ti transport strike dagiti nagduduma a grupo dagiti agiturturong ti tradisyunal jeepney intono Marso 6 agingga iti Marso 12 ita a tawen gapu iti plano a pannakaikkat dagiti tradisyunal jeepney masukatan ti modern jeep iti intero a pagilyan.
Segun ken ni Santiago, masapol a ti met laeng mismo a gobierno ti mangsolbar iti problema da nga agiturturong ti tradisyunal jeepney.
Inpetteng na a no maipatungpal ti modernization program ti gobierno ket dakkel ti epekto na kadakuada nga agiturturong ti tradisyunal jeepney ken ado dagiti mapukawan ti pagtrabahoan isut gapuna a daytoy ti rumbeng a solusyunan ti gobierno.
Nupay kasta, inpalgak na a saan a ti panangiyuswat ti transport strike ti kapintasan nga aramiden gapu ta maapektaran dagiti pasahero.
