LAOAG CITY – Immabot iti 30 nga oras ti Taslacion ti Jesus Nazareno sakbay a nakastrek iti simbaan ti Quiapo.
Daytoyen ti kabayagan a prosision a napasamak iti pakasaritaan iti panangselebrar ti fiesta ti Jesus Nazareno.
Immunan nga inrakurak idi rabii ni Fr. Ramon Jade Licuanan, Parish Priest ti Minor Basilica and National Shrine of Jesus Nazareno iti baet ti ‘Dungaw” a temporario pay laeng nga agtalinaed ti replica iti San Sebastian Church ngem nagtultuloy latta nga induron dagiti deboto ti replica.
Inlawlawag ni Fr. Licuanan, ti desisionda pakairamanan dagiti propesional, Department of Health, uniform personnel ken dadduma pay nga isardeng iti San Sebastian ti replica gapu ta delikadon ken nabasa ti kalsada idi rabii gapu iti panagtudo ken saanda a mabalin nga iyaleng-aleng ti pagsayaatan ken kinatalged ti amin.
Nupay kasta, nakigtot laengen isuda idi kellaat a naggaraw manen ti replica nga agsubli iti Quiapo Church.
Kunana a ti Quiapo Church ket pagtaengan ti Jesus Nazareno ngem saan a mabalin nga iwalin a ti ina a ni Virgen Maria ket pagtaengan met ti Jesus Nazareno.
Gapu iti daytoy, nadismaya daytoy ken nagdanag kadagiti volunteer nga iyur-uray met ti pamialiada.
Inbatad ni Fr. Licuanan a saanda laeng a kayat nga adda ti madangran isu nga inpaimada lattan iti Dios ti amin idi nagtultuloy ti garaw ti Traslacion manipud iti ‘Dungaw” iti San Sebastian Church idi rabii.
Naammoan nga immabot iti sumurok pito a milyon ti nakipaset iti Traslacion 2026.
Kabayatanna, inbatad ni Philippine National Police Acting Chief Police Lt. Gen. Jose Melencio Nartatez, Jr., nga ibilang ti nailian a pulisia a nakappia ken naurnos iti pakabuklan ti naisayangkat a Traslacion ita a tawen a maikonsiderar kas kabayagan a prosision ti Jesus Nazareno iti pakasaritaan.
Inpettengna a nangipakita daytoy ti propesionalismo ken disiplina ti kapulisan nga inwaras sipod idi karugrugi pay laeng kadagiti serye ti aktibidad agingga iti implementasion ti security plan.
Inpasingkedna a dakkel ti nagbalin a papel ti operational readiness iti pananglapped iti major untoward incidents.
Inpadanon met ni Nartatez ti pannakipagladingitna mainaig iti tallo a naipadamag a pimmusay iti kangitingitan ti Traslacion pakairamanan ti maysa a photojournalist ken dua a deboto.
