LAOAG CITY – Inpasingked ni Leo Labugen, agtawen iti 22, baro, traysikel driver ken residente iti barangay 50 ditoy ciudad ti Laoag a saan nga aglaklako ti shabu.
Reaksyon daytoy ni Labugen kalpasan a natiliw iti naiyuswat a drug buy-bust operation iti boundary iti Barangay Bani ken Barangay Libtong iti ili a Bacarra kalpasan a napan nagitulnog ti pasahero na ti nasao nga ili.
Nakumpiskar dagiti otoridad ti maysa a pack ti sigarilyo nga adda ti karga na a dua a dakkel a sachet a naglaon iti maatap a shabu, lighter, wallet, kutsilyo, ken adda pay ti dua a supot ti pakwan a nakaikabilan dagiti uppat a babassit a sachet a naglaon met laeng ti maipagarop a shabu.
Inlawlawag ni Labugen nga awan ti ammo na kadagiti naala kenkuana nga ebidensya ken kalpasan a naitulnog na ti pasahero na idiay ili ti Bacarra ket sinada dagiti pulis.
Kabayatanna, inpetteng met ni Police Chief Inspector Rodelio Santos, ti chief of police iti ili a Bacarra a naglako ti maipagarop a shabu ni Labugen iti maysa a pulis a nagpammarang a poseur buyer iti nakatiliwan ti suspek.
