LAOAG CITY – Natiliw ti maysa a tricycle driver iti naiyuswat nga anti-illegal drug buy-bust operation ditoy ciudad ti Laoag.
Ti suspek ket agtawen ti 33 ken residente iti Barangay 23, San Matias ditoy ciudad ti Laoag.
Segun iti Philippine National Police, naglako ti suspek ti maipagarop a shabu iti police poseur buyer iti balor a 1000 a pisos.
Naaala pay manipud iti suspek ti tallo a sachet ti maipagarop a shabu, drug paraphernalia ken dadduma pay a personal a ramit daytoy.
Naamoan a ti suspek ket ummunan a natiliw idi Setyembre 29, 2022 babaen met laeng iti iligal a droga ken nakaruar iti pagbalodan iti November 16, 2022 babaen iti plea bargaining.
Malaksid iti daytoy, natiliw manen daytoy babaen met laeng iti drug buy-bust operation ken naipan iti Bilibid Prison ken nakaruar laeng idi Oktubre 27, 2025.
Kabayatanna, manamnama a mapilaan ti kaso a panaglabsing iti Republic Act 9165 wenno Comprehensive Dangerous Drugs Act of 2002 ken nagtalinaed ti suspek iti Philippine National Police.
