LAOAG CITY – Imminom ti maysa a tricycle driver ti muriatic acid kabayatan ti kaadda na iti parkingan iti likud ti Provincial Engineering Office iti Barangay 7-B ditoy ciudad ti Laoag.
Daytoy ti inbatad ni Police Lt. Col. Rafael Lero, ti chief of police ditoy ciudad ti Laoag.
Binigbig ni Lero ti biktima a ni Jun Gapusan, agtawen ti 33, taga Barangay 32-A, Lapaz ditoy ciudad.
Segun ken ni Lero, nangngeg ti agnagan ti Norberto nga agpapaarayat ni Gapusan isut gapuna a napan iti ayan na ket ditoy a nakita na nga agbakbakwar ti biktima iti abay a mismo ti tricycle na.
Dagus a nangayab ti tricycle ni Norberto ken intaray na ti biktima iti Governor Roque Ablan Senior Memorial Hospital (GRASMH) ditoy ciudad para iti pannakataming na.
Inbaga na nga iti panagimbestigar da ket nakita da iti lugar ti nakabotelya a muriatic acid a dandanin maibus, kasta met ti arak ken softdrinks, pakairamanan ti sangasupot a sitchirya.
Malaksid iti daytoy, adda pay ti nakita dagiti otoridad a suicide note ti biktima a naipan iti supot iti mismo a tricycle na ngem nagkedked pay laeng a mangipublikar ti linaon na.
Segun iti kayong ti biktima, awan ti ammo da a problema ni Gapusan ngem kanayon nga agin-inom daytoy.
Iti agdama, kuna ni Lero nga agtultuloy a maag-agasan ni Gapusan iti nasao nga ospital idinto nga itultuloy da met ti agimbestigar iti napasamak.
