LAOAG CITY – Naarestar ti maysa a tricycle driver iti naisayangkat a drug buy-bust operation iti amyanan ti Carabao Center iti paset ti Barangay Tabug iti ciudad ti Batac.
Nabigbig ti suspek a ni Alymer Abdon y del Rosario, residente iti Brgy Acosta iti ciudad ti Batac.
Nakumpiskar iti ikot ni Abdon ti uppat a sachet a naglaon ti maipagarop, karaman ditoyen ti dua a maibagbaga nga inlako na nga agbalor ti 500 a pisos.
Napalalo ti pungtot ni Abdon gapu iti pannaka-arestar na gapu ta inpetteng na nga awan ti illegal nga aramid na ken saanna a kukua dagiti illegal a droga ken buy-bust money a nakumpiskar kenkuana.
Inadmitir na a rinabii nga agin-inom ti arak ngem isu laeng ti bisyu na.
Inlawlawag na nga adda ti nagpatulnog kenkuana it nadakamat a lugar ngem ditoy metten a maipagarop nga inarestar da.
Kabayatanna, inbatad ni Police Lt. Col. Michael Reynaldo Agoncillo, chief of police iti ciudad ti Batac a nabayagen a monmonitoren da ti suspek ken daytoy ket drug surrenderer ken isuna ket maipagarop a pusher ken user.
Inbatad ni Agoncillo a ti laengen korte ti agdesisyon ken mangtingiting no lehitimo wenno saan ti insayangkat da nga operasyon.
