LAOAG CITY – Naarestar ti maysa a tricycle driver iti naisayangkat a drug buy-bust operation iti tiendaan iti ili ti Bacarra.
Nabigbig ti suspek a ni Tomas Nelson Cadiente y Lacar, agtawen ti 56, addaan ti live-in partner, tricycle driver ken residente iti Brgy 8 iti nasao nga ili.
Dagus a tiniliw dagiti kameng ti Philippine National Police (PNP) ken Provincial Drug Enforcement Unit (PDEU) ni Cadiente kalpasan a naglako ti maysa a sachet a naglaon ti maatap a shabu iti maysa a pulis a nagpammarang a poseur buyer nga agbalor ti sangaribo a pisos.
Iti pannakakapkap ni Cadiente ket adda pay ti nakumpiskar dagiti otoridad a dua a sachet a naglaon ti maatap a shabu, belt bag na a naglaon ti lighter ken sigarilyo.
Nupay kasta, inlawlawag met ni Cadiente nga adda ti lalaki a naglugan iti tricycle na iti high school ken nagpaitulnog iti tiendaan.
Inbatad na nga apaman a nakadanun da iti tiendaan ket inkabil da iti awan matatao na ken kellaat da lattan a pinagpakleb.
Inpasingked na nga awan ti ammo na no apay insayangkatan da ti operasyon gapu ta saan met nga aglaklako iti illegal a droga.
Inadmitir na a napadasan na ti nagusar ngem nabayagen nga insardeng na.
Kabayatanna, inbatad ni Police Chief Master Sergeant Harold Nicolas, ti mangidadaulo ti PDEU ditoy probinsya, karaman ni Cadiente iti drug watchlist iti Provincial Level ken kakadwa na dagiti immunan a natiliw da gapu iti illegal a droga.
Mainaig iti daytoy, pinasingkedan met ni Mr. Edwin Cadiente a naminpinsanen a nagbalbaliw ti kabsat na kalpasan nga insardeng na ti agusar iti illegal a droga.
Kuna na a minalem nga aggiinom da iti kabsat na ken awan pulos ti madmadlaw da a sabali a garaw na isu a nasdaaw da kalpasan a natiliw daytoy.
