LAOAG CITY – Inrakurak ti Department of Energy (DOE) a posible ti rollback ti presio dagiti produkto a petrolyo inton sumaruno a lawas a mabalin nga umabot iti P13 agingga P15 iti kada litro ti maikissay para iti diesel ken P1 agingga P2 met iti gasolina.
Segun ken ni Department of Energy Undersecretary Alessandro Sales, bimmaba ti Mean of Platts Singapore (MOPS) a mangipakita ti posible ti panagbaba ti presio ti langis iti world market.
Namnamaen ti Department of Energy a no agtultuloy ti panagtalinaed ti world price, mabalin a makapasar pay ti big-time oil price rollback ti pagilian.
Nupay kasta, ad-adalen ti Marcos Administration ti posible a panangsuspenso ti excise tax ti diesel ken gasolina kalpasan nga immunan nga addang ti panangikkat ti buis ti LPG ken kerosene.
Basar iti Department of Finance (DOF), ur-urayenda ti pormal nga executive order sakbay a maiyimplimentar dagiti pagannurotan.
Malaksid iti daytoy, kuna ti Department of Energy (DOE) nga umanay ti suplay ti langis nga umabot agingga 51 nga aldaw nga inventory rason no apay awan ti panagkurang ti petrolyo iti agdama.
Naammoan a mabalin a makaala dagiti driver ken operator ti jeep ken UV express vans ti P10 iti kada litro a fuel subsidy kadagiti 52 a paggasolinaan iti Metro Manila a mabalin nga umabot iti P30 iti kada litro ti pakabuklan a kissay ti presio ti diesel no iraman ti manamnama a rollback inton sumaruno a lawas.
