LAOAG CITY – Balligi a naarestar dagiti kameng ti Philippine National Police iti ili ti San Nicolas ti maysa a tricycle driver iti naiyuswat nga Anti-Illegal Drug Buy-Bust Operation iti Bgry. 14 San Gregorio iti nasao nga ili.
Nabigbig ti suspek a ni Jessie Bernado, agtawen ti 32, awanan asawa, tricycle driver ken residente iti Bgry. 8 San Rufino iti ili ti San Nicolas.
Nakumpiskar kenkuana ti maysa a heat-sealed plastic transparent sachet nga aglaon ti maipagarop a shabu a sumurok-kumurang maysa a gramo ken mapatta-patta nga agbalor ti P6,000.00.
Mainaig iti daytoy, nakumpiskar pay iti suspek ti maysa a genuine P1,000.00, lima a peke a kuarta a nausar kas buy-bust money, maysa a P500.00, lima a P50.00 ken ti Tricycle for hire a lugan na.
Naamoan a ti maysa a sachet a naglaon ti maipagarop a shabu ket maipagarop nga inlako ti suspek iti nagpammarang a poseur-buyer karaman ti innem a ribo a pisos a nausar kas buy-bust money.
Inbatad ni Pol. Maj. Reginaldo Dalipias, Chief of Police iti Philippine National Police iti nasao nga ili a makabulan nga inmonmmonitor da ti suspek ken maipagarop a dumandanon pay ti suspek nga aglaklako ditoy siudad.
Segun kenni Brgy. Chairman iti Brgy. 8 ket saanna a patien nga adda ti pakainaigan ti suspek iti illegal a droga gapu ta naiget a mamon-monitor ti subject.
Mainaig iti daytoy, segun iti ama ti suspek ket saanna a patien a kukua ti anakna dagiti nakumpiskar a maipagarop a shabu iti anakna.
Nupay kasta, naammoan a dati a drug surrenderee ti suspek idi 2016 ken maibilang a kas Street Level Individual.
Kabayatanna, nagtalinaed ti subject iti kustodiyar ti Philippine National Police iti nasao ken mapilaan ti kaso a panaglabsing iti Republic Act 9165 wenno Comprehensive Dangerous Drugs Act of 2002.
