LAOAG CITY – Inrakurak ni United States President Donald Trump a saanna a kayat dagiti Somalis idiay Estados Unidos kabayatan a planplanoen ti Immigration and Customs Enforcement ti operasion iti Minnesota.
Ti Minneapolis ken St. Paul ket am-ammo kas Twin Cities ken pagtaengan ti maysa kadagiti kadakkelan a komunidad iti intero a lubong ti Somalis ken kadakkelan idiay Amerika.
Mainaig iti daytoy, dagiti komento ni Trump ket mangipakpakita iti naiget a panangatake iti komunidad ti Somali ti Minnesota nga addan ti sumagmamano a dekada a protektado idiay Estados Unidos ngem inkarina nga ibabawi daytoy ken dagiti Demokratiko a pulitiko daytoy.
Inlawlawag ni Trump a saanna a kayat isuda iti pagilianda ken awan ti biangna kadagiti agibagbaga a saan nga husto ti ar-aramidenna.
Kunana a ti Somalia ket awan laeng gapu ta agpipinnatay laeng dagitoy ken awan ti kaipapananna.
Binabalawna ni Representative Ilhan Omar, maysa a Democrat ken ti kaunaan a Somali-American a naelektaran iti Kongreso a paulit-ulitna a nakabinnalubal iti uneg ti sumagmamano a tawen.
Kabayatanna, basar kadagiti local leaders, adda ti agarup 80 a ribu a tattao ti agnanaed iti lugar nga orihinal nga aggapu iti Somalia a kaaduan kadagitoy ket American citizens.
