LAOAG CITY – Dimmalan manen iti sabali a procedure ti TV host-actress a ni Kris Aquino tapno laeng makalasat kadagiti paspasarenna a sakit.
Iti post na online, inpakaammu ni Kris a dimmalan daytoy iti “Ultrasound guided PICC LINE INSERTION” iti Makati Medical Center duwa a lawasen ti napalabas.
Inrakurak na pay a manipud iti lima ket nagbalinen nga innem dagiti paspasarenna nga autoimmune disease.
Iti ladawan nga post ni Kris, makita nga ado dagiti doktor ken nurse nga adda iti operating room bayat a maiwaywayat ti operasyon na.
Kagiddan iti daytoy, nagyaman ti TV host-actress kadagiti amin nga espesyalista a nagtulung-tulong para iti operasyon na.
Kabayatanna, innaganan metten ni Kris ti doctor a nalink kenkuana idi, daytoy ni Dr. Mike Padlan.
