LAOAG CITY – Kinomendaran ti konseho ditoy siudad ti Laoag ti ubing a nalmes gapu iti panangisalakanna kadagiti kasinsinna ditoy siudad ti Laoag.
Ti ubing ket ni Mark Khianne Asuncion nga agtawen ti 12 a residente ti Barangay 33-A La Paz ditoy siudad ti Laoag.
Daytoy ket kalpasan nga insakripisiona ti bukodna a biag tapno isalakan dagiti dua a kasinsinna iti pannakalmes.
Segun ken ni Konsehal Jaybee Baquiran, a ti impakita ni Mark Khianne ket maysa a kinabanuar gapu ta saan a nagdudua daytoy a tulungan ti kasinsinna uray pay kasukat ti bukodna a biag.
Maipalagip a napasamak ti pannakalmes dagiti 3 nga ubbing no sadinno a 1 kadakuada ti natay iti met laeng kabaybayan ti Barangay 33 A Lapaz ditoy siudad.
Dagitoy ket pakairamanan ti 2 nga agkabsat a maysa a babai nga agtawen ti 12 ken ti maysa ket lalaki nga agtawen met ti 9 idinto a ti a ti biktima ket isu ni Mark Khianne.
Basar kadagiti otoridad, a mapan koma agdaklis dagitoy ngem nagdesision ti agkabsat nga agdigos lattan iti baybay.
Apaman a nalmes dagitoy, napan insalakan ni Mark Khiane dagitoy ket isu ti nagbatayan ti agkabsat ken rason ti pannakairebrebna ken ti banuar nga ipapatayna.
