LAOAG CITY – Naiwayat ti massive Russian aerial bombardment a nagpaut ti sumurok 12 nga oras a nakatayan ti saan a bumaba iti uppat nga indibidual ken nakasugatan ti 70 a dadduma pay idiay Ukraine.
Inbatad ni Ukrainian President Volodymyr Zelensky a ti nasao nga insidente ket napasamak iti kabisera ti pagilianda a Kyiv no sadinno nga adda ti agtawen ti 12 a babai ti karaman kadagiti nagbalin a biktima.
Kunana a nangiwayat ti Russia ti agarup 600 a drones ken sumagmamano a dinosdosena a missiles a nagturong kadagiti rehion ti Ukraine.
Inlawlawagna a nairaman pay a nadadael ti dakkel a bakery, automobile rubber factory pakairamanan dagiti apartment buildings ken civilian infrastructure.
Nagballaag ni Zelensky nga agibales ti Ukraine gapu iti panangatake ti Russia kadakuada nangruna iti paset ti Zaporizhzhia, Khmelnytskyi, Sumy, Mykolaiv, Chernihiv ken Odesa regions.
Mainaig iti daytoy, inrakurak ti Russia a nadadael dagiti military facilities ken industrial enterprises a supsuportaran ti Ukraine’s armed forces.
Basar iti Emergency services, ti nasao a panangraut ket nakatayan ti nurse ken pasiente iti Institute of Cardiology.
Kabayatanna, inpakaammo ni Zaporizhzhia’s Governor Ivan Fedorov nga adda ti 31 nga indibidual ti nadangran iti rehion pakairamanan ti tallo nga ubbing, dua a lallaki nga agtawen ti 11 ken 12 ken agtawen ti 9 a babai.
