LAOAG CITY – Naminpinsan a nauram ti dua a kadsaaran na a pagtaengan iti Barangay Taguipuro iti ii ti Bangui.
Segun kenni Senior Fire Officer III Grayson Austria, ti Municipal Fire Marshall iti ili ti Bangui, ti pagtaengan ket kukua ni Carina Gaces Espejo, agtawen ti 78.
Inbatad ni Austria a ti dua kadsaaran a pagtaengan ket naaramid babaen iti light materials ken ado pay dagiti alisto a mauram nga adda iti uneg ti balay.
Inlawlawag na a bayat nga adda da iti kamposanto ket adda ti nagreport kadakuada nga adda ti mapaspasamak nga uram rason a dagus da a nagturong iti lugar ngem idi nakadanon da ket dakkelen ti apoy.
Kunana a katulungan da a nangsebseb iti apoy ket dagiti bombero manipud iti ili ti Dumalneg ken Pagudpud.
Iti panagsaludsod da iti maysa kadagiti anak ni Carina a ni Robert Espejo, bayat nga adda da iti kubo da iti asideg ti pagtaengan da ket adda ti bimtak iti maikadua a kadsaaran ti pagtaengan da ken naggil-ayab.
Naamoan nga adda iti uneg ti Carina ngem dagus da met laeng a nairuwar sakbay a naan-anay a nauram ti pagtaengan da.
Mainaig iti daytoy, kunana a ti inisyal a kitkitaen da a namunganayan ti uram ket ti kuryente ken mapatta-patta nga agbalor ti 1.2 a milyon a pisos dagiti nauram pakairamanan ti kurong-kurong, appliances, water pump ken dadduma pay, pakairamanan ti 70 a ribo a pisos.
Iti agdama, inbatad na nga agtultuloy ti imbestigasyon ti Bureau of Fire Protection seknan iti nasao nga uram.
