LAOAG CITY – Inbatad ni Mr. William Ulep, ti Municipal Agricultural Officer iti ili ti Bacarra nga isagsagana da pay laeng ti pakaikalian dagiti baboy a maisakripisyo kalpasan a nakastreken ti African Swine Fever (ASF) virus iti
Sitio Callutit, Barangay Buyon ti nasao nga ili.
Inpakaammo na nga umabot iti 29 a baboy ti maisakripisyo no sadinno a 13 ditoy ti buryas 16 ti dadakkel pakairamanan ti siyam a pangganakan.
Inlawlawag na a basar iti akintaraken kadagiti baboy a nagpositibo ti ASF virus ket awan ti ammo na no kasanu a naapektaran ti nasao a sakit dagiti tallo a taraken na iti baet a naiget ti panagbantay dagiti otoridad tapno saan a makastrek ti virus iti ili ti Bacarra.
Kuna na a nagbalaw laengen ti maseknan idi adda ti matay a taraken na ken iti pannakaeksamen ti blood sample na ket nagpositibo ti ASF virus.
Immapela met ni Ulep kadagiti umili nga awan ti rumbeng a pagdanagan da gapu ta ar-aramiden da amin a kabaelan da tapno saanen a maiwaras ti virus iti nasao nga ili.
Inpasigurado na met a masurot amin a proseso mainaig iti pannakaikali ken pakaikalian dagiti maisakripisyo a baboy iti nadakamat a lugar.
