LAOAG CITY – Umabot iti tallo a ribu a delegado ti makipaset iti Regional Schools Press Conference a maisayangkat iti siudad ti Batac.
Segun ken ni Dr. Marilou Bala Sales, Chief ti Curriculum Implementation Division – Department of Education iti siudad ti Batac, ita laeng a mapadasan iti siudad ti Batac nga ag-host ti Regional Schools Press Conference babaen iti panangidaulo ni Mr. Anselmo Aludino, Schools Division Superintendent ti Department of Education iti siudad ti Batac.
Inbatadna a naiget ti panangilatangda ti pundo ken panangisagsaganada kadagiti billeting schools iti siudad ken iti kabangibang nga ili.
Inlawlawagna a saan a kabaelan ti siudad nga akomodaren amin dagiti nasao a delegado isut gapuna a nagkiddawda ti tulong iti ili ti San Nicolas ken iti ili ti Paoay.
Kabayatanna, inpasigurado ni Mayor Markee Chua a nakasaganan ti lokal a gobierno iti nasao nga aktibidad.
Inpettengna nga awan ti agbalin a problema iti danum kadagiti billeting areas.
Kunana a mamindua a daras iti maysa a lawas ti pannakitaripnongna kadagiti maseknan nangruna ti Department of Education.
Innayonna nga addanto ti maiyuswat a Mayor’s Night tapno maipakita ti kinasayaat ken panagsangaili kadagiti bisita dagiti residente iti siudad ti Batac.
