LAOAG CITY – Umaboten iti 21,500 dagiti nabenipisiaran ti Libre a Pagluganan nga ididiaya ti gobierno probinsial baben ti Metro Ilocos Norte Council (MINC).
Segun ken ni Mr. Al Joseph Rubio, mangidadaulo ti Metro Ilocos Norte Council, daytoy ti inaldaw nga average a maserserbian ti nasao a programa.
Inlawlawag na a dagiti benepisiario ti nanggundaway iti napalabas a sangapulo nga aldaw a pannakaisayangkat ti nasao a programa sipud idi Abril 6 ken maisaysayangkat daytoy iti aldaw ti lunes agingga iti biernes.
Inpakaammo na nga iti agdama ket 39 dagiti pampasahero a jeep ken dua a bus dagiti kabinbinnulig ti probinsia iti daytoy a programa manipud iti amianan agingga ti siudad ti Laoag ken manipud iti abagatan agingga ti siudad ti Laoag pakairamanan dagiti aggapgapo iti dumaya a paset ti probinsia agingga ti siudad ti Laoag.
