LAOAG CITY – Nauram ti umuna a kadsaaran iti 2-storey residential house ni Sangguniang Bayan Member Nelson Lucas iti Brgy. 3 Lorenzo iti ili ti Banna.
Segun ken ni Senior Fire Officer 4 Reynante Bismonte, Municipal Fire Marshal iti nasao nga ili, nangrugi ti uram iti puesto ti negosio a motorparts ti anak ti Konsehal a ni Mr. Michael Lucas nga adda iti umuna a kadsaaran ti pagtaengan.
Inbatadna nga alisto a nagramram ti apoy ken napuskol ti asokna isu nga inkarigatanda nga inyal-alisto ti panangisalakan kadagiti appoko ken dadduma pay a miembro ti pamilia.
Inlawlawagna a segun iti anak ni Konsehal Lucas ket mapattapatta a dumanon iti 2.5 a milyon a pisos ti balor iti pannakadadael kadagiti nauram a kagamitan.
Kunana nga agtultuloy pay laeng ti maiwaywayat nga imbestigasion no ania ti namunganayan ti uram.
Innayonna nga awan dagiti nairekord a nasugatan wenno nadangran iti napasamak nga uram.
