LAOAG CITY – Timmama ti drone ti Russia iti maysa nga apartment building iti Romania, a maysa a pagilian a kaalyado ti nabileg a military alliance a North Atlantic Treaty Organization (NATO).
Segun iti Romanian General Inspectorate for Emergency Situations, bimtak ti sibubukel nga explosive payload ti drone a nangitunda ti dakkel nga uram iti pasdek ken nakasugatan ti dua nga indibidual.
Basar iti report, dagus a naagasan ti dua a residente a nagsagaba ti sugat idinto a 70 a sabsabali ti natalged a naibakwit kabayatan ti pannakasebseb ti apoy.
Napasamak ti insidente iti abagatan a paset ti Galati, a masarak asideg iti border ti Ukraine.
Dagus a kinondenar ti Foreign Ministry ti Romania ti napasamak nga inawagan na a maysa a “seryoso ken reckless escalation manipud iti Russian Federation.
Nupay saan a daytoy ti umuna a gundaway nga adda ti bimmgsak a drone ti Russia iti teritoryo ti maysa a NATO member iti uneg ti uppat a tawen a gubat iti Ukraine, daytoy ti kaunaan a gundaway nga adda dagiti nasugatan a sibilyan iti Romania.
Kalpasan ti insidente ket dagus a nagpaawag ti emergency meeting ni Romanian President Nicusor San iti Supreme Council of National Defense.
Nangipatungpal ti konseho kadagiti maiyannatop nga addang konta iti Russia.
Indeklarar met ti presidente ti Romania a ti Russian Federation ti agsungbat iti napasamak.
Sakbay ti panagbettak ket nangipatulog ti Romania ti dua nga F-16 fighter jets tapno bantayan ti airspace da kalpasan a na-detect ti iseserrek dagiti drone.
Nagkiddaw metten ti pagilian kadagit kaalyado na iti NATO ti nayun nga anti-drone capabilities.
Iti agdama, awan pay ti inparuk-at nga statement wenno komento ti Russia mainaig iti insidente.
