LAOAG CITY – Kinumpirmaran dagiti otoridad idiay Norway ti kaunaan a kaso ti avian influenza wenno bird flu iti maysa a polar bear iti Europa kalpasan a naduktalan ti H5N5 strain iti Svalbard region iti Arctic.
Segun iti Norwegian Veterinary Institute, nabirokan idi Mayo ti bangkay ti maysa a lalaki a polar bear a mapatta-patta nga agtawen ti maysa kaduana ti maysa a walrus iti agniebniebe nga archipelago a sumurok-kumurang 1,000 a kilometro manipud iti North Pole.
Iti naiwayat a laboratory testing, rimmuar a positibo iti H5N5 variant ti avian influenza dagiti sample manipud iti dua nga ayup.
Inbatad ni Ragnhild Tonnessen, bird flu coordinator ti institute, makapadanag ti agtultuloy a panagngato ti kaso ti virus kadagiti mammal iti Europa.
Innayonna a lumawlawa ti sakup ti virus agingga iti Arctic a mabalin a mangitunda ti peggad kadagiti sensitibo nga ecosystem ken wildlife population.
