LAOAG CITY – Rinugyanen ti Constitutional Court iti South Korea ti nangdengngeg iti impeachment complaint kontra ken ni suspended President Yoon Suk Yeol.
Daytoy ket tapno adalen ken tingitingen a naimbag no rumbeng a maikkat iti serbisyo kalpasan ti panangideklarar na ti apagbiit a martial law iti napalabas a bolan.
Nagpaot laeng ti panagdengngeg iti uppat a minutos gapu ta saan a napan nagatendar ni President Yoon.
Iti nagbalin a palawag ti abogado ni Yoon, kunana a saan napan nagatendar ti kliyente na iti naiyuswat a panagdengngeg para iti kinatalged ken seguridad na kalpasan nga addan ti naiparuk-at a warrant of arrest kontra kenkuana.
Maipalagip a nasuspenso ti presidente kalpasan a nagbotos dagiti miembro ti bukod na a partido kadwa da ti oposisyon para iti pannaka-impeach na.
Nupay kasta, pormal laeng a maikkat iti serbisyo ni Yoon no adda ti innem manipod iti walo a miembro ti Constitutional Court nga agbotos para iti naan-anay a pannakapadisi ti presidente iti pwesto na.
Naamoan a ti sumaruno a panagdengngeg ket na-schedule intono huwebes.
