LAOAG CITY – Indeklarar ti Philippine National Police (PNP) ken Philippine Coast Guard (PCG) a nagbalin a natalna ken naurnos ti pananglagip ti Undas 2025 basar iti report kadagiti command center.
Inbatad ni Philippine National Police acting chief Lt. Gen. Jose Melencio Nartatez Jr., awan ti nairekord nga insidente kadagiti kamposanto, terminal ken dagiti dupudop a lugar iti intero a pagilian.
Adda ti sumurok 50 a ribu a pulis ti naiwaras sipod idi Oktubre 30, kabinnulig ti Armed Forces of the Philippines, Philippine Coast Guard ken dagiti lokal a gobierno.
Kabayatanna, inpakaammo ni Philippine Coast Guard spokesperson Capt. Noemie Cayabyab a dimmanon iti sumurok 700 a ribu a pasahero ti nagbiahe kadagiti pantalan sipod idi Oktubre 30 agingga idi Nobiembre 1 a nababbaba maidasig iti sumurok 2 a milyon a pasahero idi Undas 2024.
Basar iti Philippine Coast Guard, kaaduan kadagiti biahero ket naggapu idiay Cebu, Batangas ken Iloilo.
Kuna ni Cayabyab, napaigetan ti pre-departure inspections ken naiget nga inpatungpal dagiti pagannurotan kontra iti overloading.
Agtultuloy ti deployment ti rescue swimmers, medical teams ken floating assets kadagiti pantalan ken kabaybayan tapno masigurado ti kinatalged dagiti biahero iti panawen ti Undas.
