LAOAG CITY – Umabot iti 60,000 a pisos ti tulong naipaay iti pamilya ti biktima iti napasamak a desgrasya iti bypass road a sakupen ti Barangay Tangid ditoy ciudad ti Laoag.
Tig-tallo a ribu a pisos ti inted ti driver ti nakamotorsiklo ken ti nakalugan iti kotse kas tulong iti pamilya ti biktima.
Maipalagip a nagdinnungpar ti maysa a motorsiklo nga inturong ni Christian Balicat, agtawen ti 23, ken residente iti Brgy. 28 San Bernabe, ditoy ciudad ti Laoag, ken addaan ti back ride nga isu ti natay a ni Jade Santos, agtawen ti 32 ken residente iti Brgy. 7-B ditoy ciudad. Idinto a ti kotse a nakadinnungpar ni Balicat ket inmaneho ni Earl Justin Peregrino, agtawen ti 25 ken residente iti Brgy. 1 Sta. Rita iti ili ti Bacarra, ken addaan daytoy ti pasahero a nabigbig met a ni Bertneil Dolera, agtawen ti 22, tubo ti Panggasinan ngem agdama nga agnanaed iti Brgy. 1 Sta. Rita iti ili ti Bacarra.
Basar iti imbestigasyon, agpa-amianan dagiti nakamotorsiklo idinto a dagiti nakakotse ket agpa-abagatan a paset, idi nadanon da ti pagkurbaan a paset iti bypass road ket ditoy nga imagaw iti linya ti nakamotorsiklo nga isu metten ti nangitunda ti panagdinnungpar da.
Gapu iti daytoy, nagsagaba ti nakana a sugat dagiti nakamotorsiklo ken insigida a naitaray da iti Gov. Roque Ablan Sr. Meorial Hospital ngem naideklara a dead on arrival ti back ride a ni Santos.
Iti agdama, nagtalinaed pay laeng ni Balicat iti balay pagagasan para iti operasyon na gapu ta nakaru ti nagbalin a sugat na iti paset ti saka na.
