LAOAG CITY – Pinadas ti agasawa a biktima iti pammaltog iti Bondi Beach idiay Australia a lappedan ti maysa kadagiti suspek.
Nabigbig ti agasawa nga isuda Boris and Sofia Gurman.
Segun iti pamilia dagiti biktima, basar iti dashcam footage, makita ti agasawa a linappedanda ti maysa kadagiti suspek tapno maprotektaran dagiti dadduma pay a tattao nga adda iti Hannukah event.
Im-imbestigaran ti pulisia ti Australia ti maysa a biahe a nagturong ditoy Pilipinas ti dua a maipagarup nga armado a lallaki iti maysa a bulan sakbay ti nakaam-ames a pammaltog kagiddan dagiti damag a binisitada tapno umawat ti panagsanay iti istilo ti military.
Naammoan a ti agama a suspek nga isuda Sajid Akram nga agtawen ti 50 a nagbiahe nga addaan ti iggem nga Indian passport idinto a ti anakna a ni Naveed nga agtawen ti 24 ket addaan ti Australian passport.
Iti agdama, nakariingen ni Naveed Akram kalpasan a na-coma ken nagtalinaed iti ospital.
Immuna iti daytoy, inrakurak ni Prime Minister Anthony Albanese a dagiti suspek ket saan a paset ti terror cell ngem nalawag a dagitoy ket naallukoy babaen ti extremist ideology.
