LAOAG CITY – Ibilang ni P/Capt. Elison Pasamonte, Hepe ti Badoc Municipal Police Station nga arig naka-blindfold ti otoridad iti panangiwayat ti imbestigasion ti pannakapaltu-paltog ti maysa a karpintero a ni Fernando Baldugo y Dahilig, agtawen ti 51, naasawaan ken residente ti Sitio Cabuan, Brgy. Napu iti nasao nga ili.
Segun kenkuana, daytoy ket kalpasan nga awan ti atapen wenno mapanunot ti pamilia ti biktima a mabalin a mangaramid iti nasao nga insidente.
Inbatadna a marigatanda pay iti panangimbestigarda iti kaso gapu ta awan ti nakaimuntar a Close Circuit Television wenno CCTV camera a nakaala iti nakaam-ames a pasamak.
Naammoan a nagsagaba ti sugat ti biktima iti akinkannawan a barukongna ken akinkannawan a kidayna.
Maipalagip a natay ti biktima kabayatan a mangmangan iti pagtaenganda gapu iti kellaat a panangpaltu-paltog ti saan pay a nabigbig a suspek iti namindua a daras babaen ti maipagarup a calibre 45 a paltog.
Immuna iti daytoy, narekobre dagiti otoridad iti nakapasamakan ti krimen ti walo a kapsula ken uppat a bala ti calibre 45.
