LAOAG CITY – Kinumpirmaran ni PLt. Vivina Tanacio, ti deputy chief of police iti PNP-Badoc a nabirukanen ti bangkay ti babai a naiyanod iti karayan iti nasao nga ili idi Oktubre 11 ita a tawen.
Nabigbig daytoy a ni Emily Yadao y Ancheta, agtawen ti 33, naasawaaan ken residente iti Sitio Lasien, Barangay Nagrebcan, Badoc Ilocos Norte.
Segun kenni Tanacio, nakita ti bangkay ti biktima iti Barangay Balbaldez iti nasao met laeng nga ili.
Inlawlawag na a ti nakakitaan iti bangkay ti biktima ket nasurok a 200 a metro ti kaadayo na manipud iti nakaiyanodan na iti Sitio Lasien.
Kunana nga intawag kadakuada ni Barangay Chairman Basilo Pagdilao Jr. nga adda ti nakita babai a naisalat iti batbato ti agnagan ti Baltazar Bautista, agtawen ti 48 ken residente iti Barangay Balbaldez.
Innayon na a kinumpirmaran ti ama ti biktima a ni Yado a mabirbirok a naiyanod ket isu ti nadiskubre iti Barangay Balbaldez.
Maipalagip a ti biktima ken dagiti tallo a kakadua na ket nakalugan iti karison a guyguyuden ti nuang ket dita a naranaan da ti panaglayos bayat ti panangdalyasat da ti karayan.
Gapu iti daytoy, saan a nakalasat ti agnagan ti biktima ken naiyanod daytoy kadua na ti nuang ken karison idinto a nakalasat dagiti tallo a kakadua na.
Naamuan a naggapu dagiti uppat a residente iti Brgy. Nagrebcan proper ken agawid dan iti Sitio Lasien.
