LAOAG CITY – Naitabonen idi kalman iti bigat ti bangkay ti biktima a napaltu-paltugan iti Brgy. San Matteo iti ciudad ti Batac.
Segun ken ni P/Lt/Col. Adrian Gayuchan, Chief of Police iti Philippine National Police iti nadakamat a ciudad nga agtultuloy ti imbestigasion nga araramiden da tapno mabigbig ti suspek nga adda ti likodan ti nasao nga insidente.
Inbatadna nga ita a gundaway ket addaan ti tallo nga indibidual a person of interest ken manamnama a manayonan daytoy kabayatan ti naununeg pay nga imbestigasion.
Mainaig iti daytoy, iti biang ni P/Sergeant Cabuyadao, imbestigador iti nasao a kaso a kinunana a maysa kadagiti adadalenda a motibo ti krimen ket mainaig iti kallabes a trabaho na.
Innayonna nga adaan iti naipaima a closed-circuit television footage kadagiti otoridad ngem adda daytoy iti adayo a lokasion, rason nu apay a marigatanda a lasinen dagiti suspek ken iti napasamak.
Kinunana, adda ti posibilidad a riding in tandem ti nangpalto-paltug iti biktima.
Mainaig iti daytoy, adda ti 5 a nagbalin a tama ti biktima, rason a nakatayanna.
Inrakurak ni Cabuyadao a manamnama nga agturongda iti pagtaengan ti biktima tapno kasarita ti asawa na daytoy.
Maipalagip nga immunan a nabigbig ti biktima a ni Marlo Arconado y Borja, agtawen ti 44, naasawaan, empleado iti MKL general merchandise ken residente iti Brgy. San Pedro iti ciudad ti Batac.
Basar iti report, iti oras ti ala-siete kinse iti rabii ket nakaawat dagiti kameng ti Philippine National Police iti report manipod iti maysa a concerned citizen seknan ti napasamak a pammaltog iti Batac-Banna road, bisinidad iti Brgy. San Mateo iti nasao a ciudad idi Hunio 5.
