LAOAG CITY – Inbatad ni Dra. Sinamar Abando, Municipal Health Officer iti ili ti San Nicolas a dimmalanen iti eksaminasyon ti bangkay ni Juvilyn Bardiaga, asst. manager ti savemore a nabirukan nga awanen ti biag na iti apartment na iti Barangay 2 iti nasao nga ili.
Segun kenni Abando, iti inisyal a panangeksamin na ket adda ti lemma iti tengnged na a mabalin a gapo iti panangbekkel ti suspek babaen ti cord ti rice cooker.
Nupay kasta, kuna ni Abando nga agpapan ita ket saan da pay a maibaga no narames ti biktima.
Kunana nga iti inisyal a panangkita da ket awan ti nakita da a sugat iti aglawlaw ti pribado a paset ti bagi ti biktima.
Kabayatanna, inbatad ti PNP-San Nicolas a nakita dan dagiti CCTVs iti aglawlaw ken ti suspek ket nagna iti tawa ti apartment ken rimwar iti ridaw.
Kuna ti pulisya a saan a makita ti langa ti suspek gapo ta dagiti CCTVs ket black and white.
