LAOAG CITY – Naipadalan ti DNA test ti bangkay ti maladaga a naipaanud iti waig iti paset ti Barangay Abkir iti ili ti Vintar iti kallabes.
Daytoy ti inbatad ni Police Major Reynaldo Dalipias Jr., ti chief of police iti ili ti Vintar.
Inlawlawag na nga adda ti person of interest da no siasinno ti possible nga ina ti nasao a maladaga.
Kuna na a babaen ti pannakaipadalan ti DNA test ti bangkay ti maladaga ket makumpirmaran da no ti person of interest da ket isu metlaeng ti ina ti ubing.
Innayon na a maamoan ti resulta iti DNA test ti bangkay ti maladaga kalpasan ti dua agingga iti tallo a lawas nga iparuk-at ti Crime Laboratory ti PNP-Regional Office.
Immun-una iti daytoy, nakutkut ti nakaitabonan ti maladaga babaen ti panagusar dagiti otoridad ti backhoe gapu ta ti payloader nga immuna a nausar ket saanna a kinabaelan gapu ta nauneg unay.
Naamoan a ti nakaitabonan ti maladaga ket isu ti nakaipunpunan dagiti pimmusay a nagpositibo ti covid-19 iti ili ti Vintar.
Maipalagip a nakigtot dagiti sumagmamano a construction workers kalpasan a nakita da ti agtatapaw a bangkay ti maysa a maladaga a babai iti waig iti Barangay Abkir iti ili ti Vintar.
