LAOAG CITY – Sumango iti kaso a frustrated robbery ti barito a suspek iti panagtatakaw iti Barangay 11 Sta. Rosa iti ili ti Sarrat.
Segun ken ni P/Capt. Ashley Cacayorin, Hepe ti Sarrat Municipal Police Station, kabayatan ti pannakisarsaritana iti suspek ket inadmitirna a datin nga ar-aramidenna ti panagserrek kadagiti pagtaengan tapno agtakaw.
Inbatadna a ti pagtaengan a nakatiliwan ti suspek ket namin-adun a daras a sinerrekna ngem saan laeng a madukduktalan dagiti akinkukua ti balay.
Inlawlawagna a masdaaw ti akinkukua ti pagtaengan no apay a makurkurangan ti kuarta ken dadduma pay a ramitna ngem saanna nga inkankano daytoy gapu ta saanna nga inpagarup nga adda ti sumsumrek iti balayda.
Kunana a ti pagtaengan ti biktima ken ti suspek ket agabay laeng.
Maipalagip a naarestar ti maysa a barito kalpasan a nagtakaw ti sumagmamano nga alahas pakairamanan ti dua a pares ti aritos, maysa a gold necklace, maysa a bracelet nga addaan ti uppat a rings ti diamond stones nga agbalor ti 70 a ribu a pisos ken maysa a tulbek ti pagtaengan a mapapati nga inusar ti suspek tapno makastrek iti pagtaengan.
