LAOAG CITY – Kinumpirmaran ni Pol. Captain Eduardo Santos, ti chief of police ti PNP-Pagudpud a nanayunan ti bilang dagiti naibakwit gapo iti Bagyo Ramon.
Segun kenni Santos, umabot ti 130 nga indibidwal ti naibakwit manipud iti Bgy. Pansian idinto nga umabot ti 219 nga indibidwal ti naibakwit iti Barangay Pasaleng.
Inlawlawag na nga iti nagpatnag ket binantayan dagiti pulis dagiti naibakwit tapno masigurado ti kinatalged da nga adda iti evacuation center.
Inbatad pay ni Santos nga idi ipatpatungpal da ti forced evacuation idi kalman ket adda dagiti natangken ti ulo na ngem babaen ti pannakisarita da a kameng ti pulisya iti nasao nga ili ket naallukoy da met laeng dagiti maseknan.
Kabayatanna, kuna ni Santos nga awan ti naimaldit a landslides iti nasao nga ili.
