LAOAG CITY – Ad-adda pay a paigetan ti Civil Security Office ditoy siudad ti Laoag ti panagbantayda kalpasan iti napasamak a panagtatakaw.
Inbatad ni Mr. Rey Domingo, Officer In Charge a kinasaritanan dagiti adda iti babaenna tapno agbalin nga alerto iti panagbantay kadagiti amin nga opisina ti lokal a gobierno.
Inlawlawagna a kanayonda met a nakamonitor iti uneg ken ruar ti City Hall ngem kadayta a gundaway ket napanda amin nagiggem ti placard kadagiti nagduduma nga opisina iti naisayangkat a flag raising ceremony.
Inpasingkedna nga aramidenda ti amin a kabaelanda babaen ti tulong dagiti otoridad tapno insigida a matiliw ti suspek.
Inpanamnamana nga ad-adda pay a paigetanda ti panagbantay tapno saanen a maulit pay ti napasamak a panagtatakaw iti lokal a gobierno.
Maipalagip a natakawan ti maysa nga empleado ken maysa a Government Internship Program ti Community Affairs Office iti lokal a gobierno ditoy siudad iti Laoag.
Immuna iti daytoy, naammoan a ti suspek ket maysa a menor de edad a babai nga agtawen ti 14 ken residente ti Barangay 2 ditoy siudad ti Laoag.
