LAOAG CITY – Nagtalinaed pay leng iti Mariano Marcos Memorial Hospital and Medical Center iti siudad ti Batac ti driver ti motorsiklo kalpasan iti napasamak a desgrasia iti Brgy. 24 ditoy siudad ti Laoag.
Daytoy ti inpakaammo ni Police Master Sergeant Artemio Magaogay iti Philippine National Police iti Traffic Division ditoy siudad.
Segun kenkuana, umaboten iti makalawasen ti napalabas kalpasan iti napasamak a desgrasia ngem agingga ita ket saan pay nakaruar ti driver ti nakamotorsiklo gapu ta nag-crack ti pangana daytoy.
Inpakaamona a tumulong met iti gastosen iti panagpaagas iti ospital ti truck driver.
Maipalagip, nagdinnungpar ti maysa a motorsiklo ken truck iti Brgy. 24 ditoy siudad ti Laoag.
Nabigbig ti driver ti motorsiklo nga Aerox nga agmaris ti nangisit a ni Aaron Cristobal y Anacleto, agtawen iti 20, awanan asawa, estudiante ken residente ti Brgy. 54-B Camangaan ditoy siudad ti Laoag idinto a nabigbig met ti nangiturong ti Isuzu Truck a ni Marcial Pasion y Mangrubang, agtawen iti 51, awanan asawa ken residente ti Brgy. Elizabeth iti ili ti Dingras.
Basar iti Laoag City Police Station, agturong nga agpa-laud ti nakamotorsiklo idinto nga agturong met nga agpa-daya ti truck ket nag-left turn ti truck a nangitunda ti panagdinnungparda.
Gapu iti daytoy, nagsagaba ti sugat ti driver ti motorsiklo ken ti kinalubbonna iti nagduduma a paset ti bagida a naitaray dagitoy iti Governor Roque B. Ablan Sr. Memorial Hospital idinto a saan met a naan-ano ti nangiturong ti truck. Kabayatanna, naammoan a naiyakar iti Mariano Marcos Memorial Hospital and Medical Center iti siudad ti Batac ti driver ti motorsiklo para iti naan-anay a pannakatamingna.
