LAOAG CITY – Mannarimaanen a maisagsagana dagiti dokumento a kasapulan tapno naan-anayen a mapilaanen ti kaso ti dua nga indibidwal a natiliw babaen iti naiwayat nga Anti-Illegal Drug Buy-Bust Operation iti ciudad ti Batac.
Daytoy ti inrakurak ni P/Lt/Col. Adrian Gayuchan, chief of police iti Philippine National Police iti nasao a siudad.
Kinunana a dagiti naarestar nga indibidwal ket manamnama a sumango ti kaso a panaglabsing ti Republic Act 9165 wenno Comprehensive Dangerous Drugs Act of 2002.
Maipalagip a natiliw dagiti otoridad ti dua a lallaki babaen iti naisayangkat a Anti-Illegal Drug Buy-Bust Operation iti Brgy. Magnuanag iti siudad ti Batac.
Binibig ti Philippine National Police iti siudad ti Batac ti subject a ni Maynard Manglan-lan, agtawen ti 31, naasawaan, driver iti lokal a gobierno, ken residente iti Brgy. Bil-loca, idinto a ti kadua ti subject ket ni Justine Gongora, agtawen ti 22, baro, awanan trabaho ken residente iti Brgy. Rayuray iti nasao a siudad.
Nakumpiskar manipud iti subject ti 16 a pedaso ti plastic sachet a naglaon iti maatap a shabu ken maysa a ribu a pisos a nausar kas buy-bust money.
Naammoan nga High Value Individual ken Newly Indentified Subject maipapan iti nasao a banag.
