LAOAG CITY – Nauram ti sumagmamano a paset ti dua a kadsaaran a commercial building iti Brgy. 1 ditoy siudad ti Laoag.
Segun ti maysa kadagiti empleado ti pasdek a nakasarsarita ti team ti Bombo Radyo Laoag, kalpasan a naidiskarga dagiti simmangpet a delivery ti bagas ket nakita na a maur-uram ti counter iti transient.
Inbatad na a gapu iti daytoy ket dagus a natawagan dagiti kameng ti Bureau of Fire Protection ditoy siudad.
Kuna na a dagus a nagresponde dagitoy rason a saan metten a nagramram ti uram ken awan dagiti nadangran wenno nasugsugatan.
Nu pay kasta, malaksid iti transient ket naapektaran pay ti uram ti bobeda ti grocery store nga adda iti abay ti transient.
Agpapan a maisursurat ti damag ket agtultuloy ti panagimbestigar dagiti otoridad ken saan pay a masisinunuo ti namunganayan ti uram pakairamanan ti balor dagiti nadadael.
