LAOAG CITY – Linawlawagan ni Barangay Kagawad Bryan Casabay iti Barangay 14 iti ili ti San Nicolas ti isyu mainaig kadagiti ayuda a naikabil iti balayda nga inbunong da kadagiti sumagmamano a kabarangayan na.
Inbatad na nga idi bigat ti Sabado ket adda ti 103 a karton nga ayuda manipod iti kapitolyo probinsyal a naikabil iti balayda.
Segun ken ni Casabay, dinamag na no apay nga isuna ti nangikabilan da ken saan a ni Barangay Chairman Florendo Corpuz, ngem inpetteng dagiti napan nangikabil kadagiti ayuda nga isuna ti mapan agibunong kadagiti nalayos a residente iti nadakamat a barangay.
Inadmitir na a napanunot na idi a mapan ikabil ken ni Barangay Chairman Corpuz ngem gapu ta isuna ti nabilin a mapan agibunong ket tinungpal na gapu ta ti takderna ket mababaon laeng.
Inpakaammo na a ti listaan ti binunungan da ti ayuda kadagiti nagpatulongan na a pada na a konsehal ket napan da innala a mismo iti Department of Social Welfare and Development.
Innayon na nga adda dagiti nagriri a saan da a naikkan, ken tapno saanen a dumakkel ti isyu ket napanda lattan gimmatang no sadinno a ti inggatang da ket aggapo a mismo iti bulsa da.
Immuna iti daytoy, patien ni Barangay Chairman Florendo Corpuz iti Barangay 14 iti ili ti San Nicolas a saan a narespetar kas ama ti barangay da kalpasan a saan a naideretso iti Barangay Hall da dagiti relief goods manipud iti Dept. of Social Welfare and Development.
Segun kenni Corpuz, nasakit ti rikna na gapo ta saan man laeng a dimmalan kenkuana kas kapitanno diket naideretso iti pagtaengan ni Barangay Kagawad Casabay.
Naamoan a ni Casabay ket agpaidasig kas kapitan ken rumrumuar a ti kakadua na a nagibunong ket dagiti ka-line up na iti umay nga eleksyon.
Inpetteng na a nasaysayaat kuma a naipan iti Barangay Hall ken nakita na ken dagus a napan innala dagiti kakadua na a barangay officials para iti panagibunong dagitoy.
Inpalgak na nga isuna pay laeng ti kapitan iti barangay da ngem saan nga isuna ti nangawat kadagitoy ken nasken kuma a ti nagibunong ket dagiti mismo nga opisyal ti lugar da.
Kabayatanna, inbatad met ni Election Officer Wilson Balbas iti nasao nga ili a no kastoy ti sitwasyon ket mabalin nga agtennag kas premature campaigning.
