LAOAG CITY – Inpetteng ni Barangay Kagawad Mariano Cariaga Jr. iti Barangay Nagsanga iti ili ti Pasuquin nga awan ti kinapudno na kadagiti alegasyon ti agama a Caldito kontra kenkuana.
Segun kenni Cariaga, idi nagsabat da iti kalsada ket naitapwak ti maysa a ligay ti nagluganan na a kurong-kurong gapo iti ripper a naipaguyod iti elf truck nga intruong ni mark Bryan Caldito.
Inlawlawag na a madi ti rikna na gapo ta idi tinalyaw na ni Caldito ket maipagarop a nagkatawa daytoy agingga dinanon na ni Caldito ken adda ti napasamak a komprontasyon wenno nagsinnungbat daytoy.
Inbatad na a saan na nga inarmaran ti kumpay ni Caldito gapo ta ti nasao a kumpay ket kanayon nga adda iti kurong-kurong na nga us-usaren na a mangraot para iti kanen dagiti taraken na.
Inpalgak na a dati a saan da a nagkinnaawatan ket naurnos metten ken saan nga isu ti kangrunaan a rason.
Kabayatanna, inlawlawag ni Cariaga a dagiti agama a Caldito ket awan ti nagan na kadagiti makaawat ti tulong babaen iti AICS.
Dinakamat na nga idi inbaga da nga awan ti nagan dagiti agamak ket maipagarop nga isuda ti kumarit ken nagsasao ti dakes, ken idi anawaen da ket nangiruwar ti balisong ni Caldito.
Innayon na nga idi nagsasarita da iti pulisya ket nagpadespensar ngem maipagarop a saan a maawat ni Caldito.
