LAOAG CITY – Maisagsaganan dagiti dokumento para iti pannakaipila ti reklamo a Reckless Imprudence Resulting in multiple physical injuries ken homicide kontra iti driver ti dump truck a nadesgrasya iti paset ti Barangay Visaya iti ili ti Vintar.
Gapu iti napasamak a desgrasya ket maysa ti natay idinto a 19 dagiti nasugatan.
Binigbig ni Police Capt. Joseph Calderon, chief of police iti ili ti Vintar ti natay a ni Rodolfo Herrera, taga Bicol ngem naikamang iti ili ti Marcos idinto a ti driver ti truck ket ni Dante Coloma, 44, awanan ti asawa ken taga Brgy Tabucbuc iti met laeng ili ti Marcos.
Inbatad ni Calderon a ti truck ket nagkarga ti ado a batbato ket addaan ti 19 a pasahero a dagitoy ket taga Marcos, Dingras ken Sarrat.
Inlawlawag na nga iti inisyal nga imbestigasyon da, possible a saan a kinabaelan ti driver ti kinadagsen ti inturong na a lugan isut gapuna a napukawan ti preno ken kontrol iti manibela a nagresulta ti napasamak a desgrasya.
Kuna ni Calderon a napasamak ti insidente iti agkurba ken agsalog a paset ti kalsada iti nadakamat a lugar.
Naitaray amin dagiti nasugatan a pasahero iti Governor Roque Ablan Senior Memorial Hospital ditoy ciudad ti Laoag idinto a ti driver ti truck ket nagtalinaed iti kustodyar ti PNP iti ili ti Vintar.
