LAOAG CITY – Inpeksa ni Mayor Mike Hernando iti ili ti San Nicolas ti sakit ti nakemna kalpasan a pinaltu-paltogan dagiti saan pay a nabigbig a suspek ni ABC President Mark Adrian “Macky” Barba ken dagiti dua a bodyguard daytoy.
Segun kenkuana, naiget ti pammilinna iti San Nicolas Municipal Police Station a mangiwayat ti naun-uneg nga imbestigasion para iti alisto a pannakatiliw dagiti adda iti likudan ti pammaltog.
Inbatadna nga awan met dagiti report wenno impormasion a naipadanon kenkuana nga adda ti maaw-awat a pangta iti biag ni ABC President Barba.
Inlawlawagna nga awan dagiti nadakdakamat ti maseknan a Kapitan kenkuana maipanggep no adda ti problema wenno karirina.
Kabayatanna, naammoan a rumrummuar a dumanon iti sumurok 40 a kapsula ti bala ti paltog ti narekobre iti crime scene.
Immuna iti daytoy, pimmusay ni ABC President Barba pakairamanan dagiti dua a bodyguard-na kalpasan a pinaltu-paltogan dagiti saan pay a nabigbig a suspek iti sango ti Pamulinawen Hotel iti Brgy. 22 iti ili ti San Nicolas.
