LAOAG CITY – Kinumpirmaran ni Police Capt. Johnwel Balueta, ti deputy chief of police idiay ciudad ti Batac a pimmusayen ni Reygie Pambid, agtawen ti 34, naasawaan, ken residente iti Barangay Capacuan iti nasao a ciudad.
Ni Pambid ti nangiturong ti motorsiklo a nakadinnungpar ti maysa a tricycle a minaneho ni Melecio Gamuy, agtawen ti 46 iti paset ti Batac-Banna Road, bisinidad ti Barangay San Mateo iti ciudad ti Batac.
Segun kenni Balueta, immagaw ti linya ni Pambid rason a nadungpar na ti kasinnabat na a tricycle.
Pimmusay ni Pambid bayat a maag-agasan iti Mariano Marcos Memorial Hospital and Medical Center gapu kadagiti sinagaba na a nakana a sugat idinto a gasgas laeng ken ni Gamuy isut gapuna a nakarwar met laeng a dagus iti ospital.
