LAOAG CITY – Inistorya ti maysa kadagiti nagpositibo ti covid-19 a taga Paoay, Ilocos Norte dagiti immuna a narikna na a sintomas sakbay a nakumpirmaran a covid-19 ti paspasaren na.
Iti ekslusibo nga interview kenkuana ti Bombo Radyo Laoag, inbaga na nga idi ummuna nga aldaw na ket naglammin ti rabii agingga iti parbangon, ken kastoy manen ti narikna na iti aldaw.
Inbatad na a napan nagpacheckup iti Rural Health Unit (RHU) ngem awan ti gurigor na.
Iti sumaruno nga aldaw ket naglammin manen, ken nanayunan ti marikrikna na gapu ta nagulaw ken nagsakit ti ulo na.
Kuna na a rinesetaan da ti agas ngem arigna awan pay ti maysa nga oras ket nakarikna manen ti nakaro a panagulaw ken panagsakit ti ulo na.
Innayon na nga iti maikatlo nga aldaw ket kimmaro ti panaglammin, panagsakit ti ulo, panagulaw, nagsakit ti karabukob na ken agkapsuten idinto a normal ti temperatura na.
Malaksid iti daytoy, awan payen ti raman dagiti ipapauneg na a makan.
Inpakaammo na nga iti panagpacheck-up na iti Mariano Marcos Memorial Hospital and Medical Center iti ciudad ti Batac ket dimmalan iti Urinalysis, CBC, ken X-ray, ket ditoy nga adda ti nakita da iti X-ray na a naidumduma a banag iti bara na.
Innayon na nga iti pannakaiconfine na iti ospital ket sinurot ken inaramid na amin nga inbalakad kenkuana dagiti doktor kas ti panagtumar na amin kadagiti insereseta da nga agas, uminom a kanayun ti napudot a danom, mangan ti ado, ken saan a rumrumuar.
Iti agdama, ti nasao a pasyente ket nakarwaren iti ospital kalpasan a naminduan a daras a nagnegatibo ti Covid-19 test na.
Nupay kasta, inbalakad kenkuana ti doktor nga agself-quarantine pay laeng iti sabali a balay agingga a naan-anay a makarekobre ken awanen ti virus iti bagina sakbay a makipulapol iti pamilya ken dagiti katrabahoan na.
