LAOAG CITY – Napilaan ni Naveed Akram a maysa kadagiti suspek iti pammaltog iti Bondi Beach idiay Australia ti 59 a reklamo pakairamanan ti 15 counts ti murder ken panangaramid ti terrorist act idinto a ti amana a ni Sajid Akram ket natay kalpasan a nakipinnaltog kadagiti kapulisan.
Nagtalinaed a matamtaming iti ospital ti 20 nga indibidual no sadinno a maysa kadagitoy ket adda iti kritikal a kondision.
Ibilang dagiti otoridad ti nasao a panangatake kas terrorist incident kagiddan ti panangirakurak ni Australian Prime Minister Anthony Albanese a ti napasamak ket gapu iti panang-target ti agama a suspek iti Islamic State group ideology.
Basar iti Philippine immigration bureau, nagbiahe ti agama ditoy Pilipinas idi Nobiembre 1 agingga iti Nobiembre 28 a ti naudi a nagturonganda ket idiay southern city ti Davao.
Nagbiahe ni Naveed Akram ditoy Pilipinas babaen ti Australian passport idinto a ti amana a ni Sajid ket nagusar ti Indian passport.
Maipalagip nga adda ti 15 a tattao ti natay ken dinosdosena dagiti nasugatan gapu iti pammaltog kabayatan ti panangselebrar iti umuna a rabii ti Hanukkah no sadinno nga ibilang ti Australia a kakaroan a pammaltog sipod idi 1996.
Naammoan a karaman kadagiti pimmusay ket ti dua a mangisursuro, Holocaust survivor ken agtawen ti 10 nga ubing a babai a binigbig ti pamiliana a ni Matilda.
Immuna iti daytoy, pinadas ti agasawa nga isuda Boris ken Sofia Gurman a lappedan ti maysa kadagiti suspek ngem napaay dagitoy a nangitunda ti pannakatayda.
Kabayatanna, adda ti 27 a dadduma pay nga indibidual pakairamanan ti dua a pulis ti naitaray iti ospital kalpasan a nasugatan iti insidente.
