LAOAG CITY – Rumrummuar a mainaig iti negosio ti maysa kadagiti motobi iti pannakapaltog ti biktima iti napasamak a pammaltog iti Brgy. Medina iti ili ti Dingras, idi Enero 6, 2025.
Segun ken ni P/Lt/Col. Jephree Taccad, mangidadaulo ti Provincial Operation Management Unit iti Ilocos Norte Police Provincial Office, nga addan ti person of interest iti napasamak nga insidente ngem saan pay daytoy a naan-anay a nangipaay ti impormasion.
Maipalagip a napaltogan ti biktima a ni Nanette Santos wenno ad-adda nga am-ammo iti nagan a Gugay, agtawen ti 44, negosiante ti buy and sell ti baboy ken residente iti Brgy. Upig, San Ildefonso, Ilocos Sur. iti Sitio 6, Brgy. Medina iti ili ti Dingras idi Enero 6, 2025.
Basar iti biktima, immay daytoy ditoy probinsia mainaig iti negosiona a buy and sell ti baboy.
Basar iti Dingras Municipal Police Station, kabayatan a naka-parking ti nagluganan ti biktima a Mitsubishi Montero nga addaan ti plate number a CAK 8470 iti asideg ti maysa nga International Event Center kaduana dagiti tallo nga indibidual nga isuda Mark Vincent Yere, Crystal Ingan, agpada a residente iti Sinait Ilocos Sur ken Arlene Poller, residente iti San Ildefonso, Ilocos Sur ket kellaat nga adda ti immasideg kadakuada a nakamotorsiklo ket ditoy pinaltoganda ti biktima iti naminsan a daras.
Gapu iti daytoy, natamaan iti barukong ti biktima ken dagus a naitaray iti Doña Josefa Edralin Marcos Hospital ngem naiyakar iti Mariano Marcos Memorial Hospital and Medical Center iti siudad ti Batac nga addan iti nasayaat a kasasaad.
Kabayatanna, narekobre ti maysa a pedaso ti deformed fired bullet ken maysa a pedaso ti empty shell ti Calibre 45.
