LAOAG CITY – Saan a maawat ni Mrs. Nena Burgos ken ti pamilya da gapo iti pannakawaya-waya ti driver ti kotse a nangdungpar iti tricycle a nagluganan dagiti lima nga agkakapamilya a puon ti nakatayan da, iti paset ti Barangay Sucsucquen iti ili ti Piddig.
Ni Mrs. Burgos ket isu ti ina ni Eduard Burgos, ti driver ti tricycle ken maysa kadagiti pimmusay.
Segun kenni Mrs. Burgos, nasakit ti rikna da gapo ta nakarwar iti pagbalodan ni Jonathan Pacaro rason nga aramiden da amin ti kabaelan da tapno maisubli daytoy iti pagbalodan ken magun-od da ti hustisya.
Kunana a desidido da nga agipila ti reklamo iti laksid nga adda dagiti nangkasarita kadakuada a makiareglo seknan iti daytoy.
Mainaig iti daytoy, nagyaman ti nadakamat a pamilya kadagiti amin a nangipaay ti tulong kadakuada.
Maipalagip nga agpapada a pimmusay dagiti lima a naglugan ti tricycle pakairamanan ni Eduard Burgos ken dagiti dua nga annak na, ken ti katugangan na a baket ken lakay kalpasan a dinungpar ti kotse nga inturong ti nabartek a ni Pacaro.
kabayatanna, inlawlawag ni Police Lt. Rudy James Jacalne, ti chief of police ti PNP-Piddig nga adda ti release order a naawat da manipud iti piskalya rason a winaya-wayaan da ni Pacaro.
