LAOAG CITY – Isagsaganan ti Philippine National Police (PNP) dagiti dokumento para iti ipila da a reklamo kontra iti maysa a menor de edad a nangbakal ti maysa a Maria De Leon Bus iti ciudad ti Batac.
Daytoy ti inbatad ni Police Major Artemio Clemente, ti deputy chief of police iti ciudad ti Batac.
Nupay kasta, kuna na a makaammon ti korte a mangtingiting no maipursige ti reklamo wenno saan.
Inbatad met ni Clemente a nakasarita da dagiti nagannak ti saanen a nainaganan a menor de edad ken binalakadan da dagitoy a no sumipngeten ket responsibilidad da a biruken dagiti annak da.
Inpalagip na nga adda ti maipatpatungpal a curfew hour a rumbeng a suruten dagiti menor de edad.
Maipalagip nga iti panangbakal ti menor de edad ti nasao a bus ket natamaan ti ulo ti maysa a pasahero a babai.
